الغد 24 خبر الغد تقرأه اليوم

أش بغيتو بالإثراء غير المشروع.. المزعوط في أخنوش دار لاباس والمزلوط يمشي يموت!

 
محمد نجيب كومينة
 
في الواقع، وبعد تفكير عميق، وصلت وبكل موضوعية إلى أن هاذ الحكومة عندها الحق الكامل تقول نون والقلم وما يسطرون لتجريم الإثراء غير المشروع.
 
واش حنا زعما غادي نعرفو اكثر من الحكومة. وباش نكونو موضوعييين، واش واحد بحالي عندو اليوم فالكونت زيرو درهم وما كاسب حتى داسيا (شهادة الضعف كيف كيسميوها دوك اللي قطعو الواد)، غادي يفهم وغادي يدّي ولا يجيب فالإثراء المشروع وغير المشروع وفالثروة وفالملايير؟ وهو غير مليون كيبان ليه بوكو فلوس ويمكن كيشوفو فلمنام،، وخا كاع نقولو هذا بحال عبدربه كيقول كيقشع نظريا فالاقتصاد والمالية العمومية والضرائب والسياسة النقدية...، والله ما عندو ما يدي ولا ما يجيب، آبنادم ما يزيدش فيه ويتعلق فشي شبوق اللي فايتاه ودايزاه لهيه...
 
وزعما زعما، واش بصح عندنا حنا الإثراء غير المشروع؟ الحكومة هي اللي عارفة! ومللي بانْ ليها ما كاينش علاش، بغات تدير ليه القانون ولا الكمنجة والبندير.
 
نخليو حكومة السي أخنوش تدفع بعجلة النمو وتدعّم ربحية الشركات الكبيرة باش تشجع الاستثمار وتجيب الازدهار ويولي راسنا عالي فقائمة الأثرياء اللي كتنشرها مجلة فوربيس ومذكورين فالعالم كبلد للأغنياء!
 
نديوها فراسنا ونشوفو شي شطنة اخرى، نلعبو اللوطو ولا لكْيادر لعل وعسى، ونخلّيو الحكومة تدير شغلها. داك الشي ديال الإثراء غير المشروع غير شعبوية، على حساب كلام وزير العدل، وهضرة ما منهاش. وباش نجيو ملخر، اللي دّا شي دّاه واللي زلق طاح على عين كفاه.
 
هذا كلام موضوعي وما شي دفاع على الحكومة. اللي كيدافعو عليها راه مدورين الحركة، وفيهم اللي دار لاباس، وغادي يزيدو في إطار مسايرتهم للنموذج التنموي الجديد كما ستنفذه الحكومة الحالية المليئة بالكفاءات ذات الرؤية البعيدة اللي ما كتفكرش فأشياء صغيورة بحال سعر الخبز أو الزيت أو الدجاج. هوما ماشي مزلوطين، وكما يقول المثل ما كيحسب غير المزلوط...