شنگريحة وتبون ولحمامرة حبسوا الگاز.. حفروا حفرة وطاحوا فيها ولهلا يقلب

 

 

 

كاينين شي مقالعية كيدوزو حياتهم كلها غير كيقلبو كيفاش يطلعوا بالاخرين، وبشعب گاع، ومنهم هذا الكابرانات اللي حاكمين الجزائر واللي قاسمينها بيناتهم وحاضيين بعضياتهم واللي غفل طارت عينيه ومشى فيها، والكتاب اللي غادي يصدر قريبا في فرنسا غادي يطلّعها عليهم وغادي يخليهم كلهم لابسين ليكوش...

ولاينّي المشكلة هي أن ذوك اللي كيتبلاوْا بالتقوليب حتى كيولّي عندهم فالدم، شي نهار كتدور ليهُم فلخوا وكيوليوْا بلا ما يشعروا كيقولبوا فريوسهم، وهذا القالب ديال وقّفوا الغاز اللي كيدوز من المغرب لإسبانيا والبرتغال، إلى شفنا مزيان وتمعنا مزيان هوما اللي داروه لريوسهم وغادي تبين ليام باللي قالبْ مفلّس، لأن هاد الشي ديال الغاز كيكون بعقود آجلة، أي طويلة الأمد، وماشي بحال البترول اللي الثمن ديالو طالع نازل فبورصة البترول والشاري والبايع كيربحوا ولا كيتقسحوا، وفي أحسن الأحوال كتكون شي حاجة سميتها المقايسة indexation على ثمن البترول، ولكن بدريهم أو دريهمات، زعما شي لقطات، ومللي كتدخل السياسة ومنطق الرشوة والتخلويض والتحراش، عاود ثاني قصة أخرى، كيمكن الشاري يولي ضاحك على البايع ومخلّيه لا حمار لا ستة فرنك...

المغرب دابا ربح أكثر من 500 كلم من أنبوب الغاز اللي دايزة من عندو، وصبحات في ملكو هاكاك في سبيل الله ما حط فيها حتى ريال ، هدية من تبّون بتوصية من شنگريحة ولحمامرة الله يجازيهم، والسبليون ما عندهم ما يقولوا على حقاش حافظين الكونترادا وعندهم الناس بعقولهم اللي كيعرفوا باللي العقد شريعة المتعاقدين، وخا غادي يكونوا كيعضُّوا على سنانهم وكيگولوا واش هاذ خياتنا اللي حاكمين الجزائر ماشي خصنا نصيفطوا ليهم شي طُبّا يعالجوهم من البلادة والحقد...

الحاصول حفروا حفرة وطاحوا فيها ولهلا يقلب.

المتضرر الوحيد فالمغرب على حساب ردود الأفعال اللي تبّعتها هو صاحبي المبرّع بوحدو اللي مشى كيقلب على لحطب على حقاش مسكين جاه البرد فمراكش، ويمكن حتى صاحبو مصطفى الزارعي على حقاش مبراد وموالف كيسْخُن بالفورنو...