المغرب خرج ليها گوووود

كيعجبني نرجع شوية للتاريخ، لأنو من خلالو كنقدرو نفهمو أشياء كثيرة، أما اللي باقي متأثر بالشعارات "مع" أو "ضد"، فأنصحه من البداية، بلا يكمّل يقرا التدوينة، لانها موجهة للكتلة الكبيرة من المغاربة اللي متبعة الوضع من موقع تامغريبيت ديالها... علاقة المغرب بإسرائيل:
في سنة 1993، وقّع محمود عباس باعتباره ممثل السلطة الفلسطينية مع إسرائيل اتفاقية السلام، واللي سميتها اتفاقية أوسلو.
اللي تجعل الفلسطينين يعترفوا بإسرائيل، ويسعاوا للسلام معها كدولة..
في مقابل أن إسرائيل تعترف بمنظمة التحرير الفسلطينية وتسعى للسلام معها..
علاش اسمها اتفاقية أوسلو؟
معروف أن أي اتفاقية تتاخذ اسم المدينة التي توقعت فيها، إلا هاذ الاتفاقية.
فاتفاقية السلام، أو اتفاقية ترتيبات الحكم الذاتي الانتقالي، وهو الاسم الحقيقي ديالها، توقعات بين منظمة التحرير الفلسطينية وإسرائيل في واشنطن، تحت رعاية بيل كليتون، وسُميت بأوسلو، نسبة إلى المدينة النرويجية اللي تمت فيها المفاوضات السرية بين القيادات الفلسطينية والقيادات الإسرائلية من 1991 إلى 1993.
المغرب، بشكل خفي، كان جزء من هاذ المفاوضات، كيفاش وعلاش ووقتاش وغيرها من الأسئلة، ما شي وقتها الآن، ولكن ممكن ترجع تشوف لقاء ديال 1986 بين الحسن الثاني وشمعون بيريز، أو ما يسمى لقاء إفران، وتفهم أشياء كثيرة.
المهم، بعد الاتفاق بين السلطة الفلسطينية وإسرائيل، المغرب أنشأ مكتب اتصال (استوعبْ آخويا المغربي: مكتب اتصال وليس سفارة) واحد في الرباط والثاني في إسرائيل، وبالتالي العلاقة المغربية الإسرائيلية كانت بشكل رسمي وعلني بعد موافقة الأشقاء الفلسطينين...
وللإشارة بزااااااااااف الصحافييين اللي كنعرفهم الآن، كأسماء "لامعة"، خدمات في مكتب الاتصال الإسرائيلي في الرباط، وماشي شغلي فيهم، حريتهم هاذيك، غير ما ينكروش ما يتنكروش...
المغرب في 23 أكتوبر 2000، غادي يصدر بلاغ عن الخارجية المغربية، عقب الانتفاضة الفلسطينية الثانية، وغادي يسد مكتب الاتصال، لكون إسرائل أخلّت بالتزاماتها بالسلام، وأنها تمارس انتهاكات حقوق الإنسان ضد الفلسطينين...
بالمناسبة، كنتمنى السيد ناصر بوريطة يضبط التواريخ، لأنه في لقائه مع "فرانس 24"، خربق شوية التواريخ...
ومن 2000 إلى غاية 2020، استمرت العلاقات المغربية الإسرائيلية، ولكن بشكل غير معلن عنه، وفي قطاعات استراتيجية، مثلا اللي رجع وشاف الصحافة والتحقيقات الدولية في أوائل 2020، غيلقى أن المغرب اشترى من إسرئيل طائرات بدون طيار، وأن المغرب، وبلا ما نهضرو على مجال الزراعة اللي الدارالبيضاء والغرب اللي استفدوا من الشركات الإسرائيلية من 2003 إلى غاية اليوم، في مجال تخصيب النباتات والتقنيات الزراعية، وناهيك على القطااااع السياحي، شوف إحصائيات هيئة السكان والهجرة الإسرائيلية اللي كتنشر سنويا تقاريرها، راه ما بين 80 ألف و100 ألف إسرائليلي كيزروز المغرب سنويا...
أه، بالمناسبة، مللي كنقولو السياح الإسرائيليين، يعني اللي دخلوا بجواز سفر إسرائيلي، ولكني واش عارفين أن من مليون يهودي مغربي في إسرائيل، شحال من واحد عندو جواز سفر مغربي؟ راه 350 ألف يهودي مغربي عندهم جواز سفر مغربي، بمعنى كيدخلوا للمغرب كمغاربة ولا يُحسَبون في أعداد الاسرائيلين...
أه، وهاذ 350 ألف يهودي مغربي في إسرائيل مغربية الجنسية، راها صوتات على الدستور المغربي ديال 2011، بمعنى جزء من المشروعية ديال الحكومة الحالية، راه من مشروعية اليهود المغاربة...
نرجعو، للعلاقات أيضا، واش عارف أنه إسرائيل، أكثر من مرة سلمات جثامين مغاربة للمغرب كانوا يقاومون في صفوف فلسطين ضدها... ما صدقتينيش، وكتصدق حزب الله، وحماس... راني كنعطيك معلومات من بلاغات صادرة عن هذه الهيئات...
باركة هاد الشي الآن... أشنو علاقة أمريكا بالصحراء؟
هاذ الايام، كثرات التحليلات بزاااف بخصوص موضوع الاعتراف الأمريكي بمغربية الصحراء، واللي ضرني هو محللين ربطو القرار الكبير اللي توقّع (كاين اللي ردوا مجرد إعلان رئاسي فقط ههههه)، من قبل ترامب، كاين اللي ربط مصيرو ببايدن، وكاين اللي ربطوا بالكونغرس...
أي واحد يربطوا كيف ما بغا، واخا يربطوا مع شجرة..
ولكني...
بغيت فقط، نطرح سؤال، واش هاد الشي جديد؟ أو بالأحرى أشنو المستجد؟
خويا المغربي، واخْتي المغربية، بمعنى تامغريبيت، بصراحة هاد الشي ما شي جديد هاد الشي...
رجع لجميع التمويلات في إطار التعاون الدولي اللي كتقدم أمريكا للدول، حيث كل مرة كيصادق الكونغرس الأمريكي على هاذ الميزانية، يصادق أيضا على التمويل للمغرب بما فيها المناطق الجنوبية...
وكيسميها في التمويل ديالو وفي وثائقو الرسمية بالأقاليم الجنوبية المغربية...
باش نوضح أكثر، الاتحاد الأوروبي، فاش كيبغي يموّل المغرب في شي لعبة، كيقول لو هاك التمويل، ولكن لن يشمل الصحراء...
مثلا في مجال حقوق الإنسان، الاتحاد الأوروبي هو اللي موّل وخلّص ما سمي بجبر الضرر الجماعي في إطار هيئة الإنصاف والمصالحة، اللي هي بالمناسبة 13 منطقة كانت فيها معتقلات سرية، أو أنها مناطق كانت مغضوب عليها وتعرضات لانتقام من الحسن الثاني، وهاذ 13 منطقة المشمولة بجبر الضرر، من بينها كانت منطقة العيون، ولكني الاتحاد الأوروبي، رفض يموّل مشاريع في الصحراء المتنازع عليها، لهذا المغرب اضطر أنه يبدل العيون بطانطان...
عطيت فقط هاذ المثال، باش نبيّن أن أمريكا كانت كتموّل المشاريع عبر الكونغرس كل التراب المغربي بما فيه العيون والداخلة...
إذن، الناس اللي كيخمّوا في الكونغرس، من الآن كنطلبهم يرجعو يقراو التصريحات سواء ديال السيناتورات من الحزب الديمقراطي أو الجمهوري أثناء المناقشة على هاذ الميزانيات...
واش إذن هاد الشي ديال إعلان ترامب عادي؟ كنقول لا، بالعكس كبير وكبييييييير بزااااف...
المستجد، هو القنصلية بالداخلة (استوعبها مزيان آخويا المغربي، عااااافك استوعبها)، ثانيا الاعتراف العلني ليس بدعم الحكم الذاتي كحل وحيد وأوحد، وإنما الاعتراف بمغربية الصحراء (عاود استوعب هاذ الأمر)، ثالثا هي ضخ 3 ملايير الدولارات في المنطقة...
عافاكم، راه أمريكا ماشي جمعية ديال الإحسان باش تصدّق علينا، وأنها دير هاد الشي كامل والمغرب ما عندو ما يعطيها...
ملي ترجع للتقارير الاستراتيجية، والتحاليل الأمريكية، خلال الأسابيع الأخيرة، كتقول أن المغرب من بين الدول القليلة جدا التي يُعوّل عليها اقتصاديا ما بعد كورونا... وهي من الدول الآمنة حاليا من أجل الاستثمار الاقتصادي...
هاذ الهضرة ما شي ساهلة...
♦♦♦

المغرب، بكل صدق، رغم موقفي منه بخصوص سياساته الداخلية، من الاعتقالات والانتقامات، والريع والفساد اللي كينخرو... كنحس بيه دولة عريقة في السياسة الخارجية...
♦♦♦

لهذا كنقول باش نلخّص كولشي:
إعلان علاقة المغرب بإسرائيل أو علاقة المغرب بأمريكا: هو فقط ما كان غير معلنْ أصبح الآن معلنْ... 
ولكن النقط والأهداف مسجلة لصالح الوحدة الترابية...
مغربي وأفتخر...