للتواصل معنا
البريد الإلكتروني: [[email protected]]
الطلبة المغاربة في أوكرانيا.. اشتعال الحرب واندلاع الفهايمية في المغرب
علي الغنبوري
هاذي تقريبا شي شهر، السفارة ديال المغرب في أوكرانيا صدرت بلاغ قالت فيه للطلبة المغاربة يغادروا أوكرانيا بشكل سريع، نظرا لجدية خطر اندلاع الحرب مع روسيا، ولتفادي أي خطر يمكن يوقع فيه المغاربة في هذا البلد.
للأسف، بعض الفهايمية هنا في المغرب، غرّقوا مواقع التواصل الاجتماعي بالتحاليل والآراء الفاشلة ديالهم، اللي كلها طنز على بلاغ السفارة المغربية، وفيهم اللي زاد في الفهامة ديالو وولّى محلل استراتيجي وخبير معتمد عند الكرملين، وبداوا كيأكدوا أن الحرب بين روسيا وأوكرانيا مستحيل توقع، وأن السلطات المغربية ما خاصهاش تتسرع في هاذ الأمر، وتخلي الطلبة يقراوْا حيث ما غادي يوقع والو...
والأكثر من هذا، كاين اللي ولّى كيفهم في الديبلومات وولّى خبير تربوي واجتماعي، وكيحلل مصير الدراسة ديال الطلبة المغاربة إيلا جاوْا للمغرب، وكاين گاع اللي طالب وزارة الخارجية المغربية تدخّل عند أوكرانيا (اللي ما عندها ما يدّار وما تابعها والو لا حرب لا بوتين لا يديك لا يخليك) باش تضمن للمغاربة يكملوا قرايتهم عن بعد.
الخطير في الأمر، هو اليوم من بعد ما بداتْ الحرب، نفس الفهايمية بانوا عاود ثاني، وبداوْا كيطالبوا الدولة المغربية توفّر طائرات لإجلاء الطلبة المغاربة في أوكرانيا اللي الأجواء ديالها مسدودة والصواريخ كطّيح عليها بحال الشتا... وقولوا باز!!!
