للتواصل معنا
البريد الإلكتروني: [[email protected]]
ها علاش البوليساريو شعلات.. الخطط ديالها في 20 عام أنهاها الجيش المغربي في 20 دقيقة وها التفاصيل
عزيز إدمين
كثير من الأصدقاء كيطلبوا مني بعض التوضيحات أو الشروحات تتعلق بقضية الصحراء المغربية، وهذا يدل على غياب التعريف من قبل الدولة والإعلام الرسمي للمغاربة حول قضيتهم الوطنية.
لهذا سأنشر من حين لآخر بعض المعلومات والشروحات، ونبداوا بأشنو هي المنطقة العازلة؟ وكيفاش جات؟ وأشنو الرهانات ديالها؟ واشنو المقصود بشرق الجدار وغرب الجدار؟
♦♦♦♦
ملي كانت الحرب بين المغرب والبوليزاريو، كانت هذه الأخيرة كتحقّق بعض الانتصارات على المغرب، بسبب أنها كانت كتعتمد حرب العصابات، أي تضرب وتهرب، وكانت كتدخُلْ حتى وسط المغرب، في حين المغرب كان يعتمد الجيش النظامي الثقيل، وكان صعيب عليه يحرك فيلق أو طائرات باش تطارد "جيبة" وحدة وسط الصحراء.
هاذ الأمر استمر إلى غاية بداية الثمانينيات، حيث أقدم الجنرال الدليمي على فكرة بناء "جدار" طويل، يسمى عند الناس د العسكر بـ"السمطة"، الهدف ديال هاذ الجدار أولا: حسم المعارك والحرب داخل هاذ الرقعة اللي هي حوالي خُمُس مجموع الصحراء، وتمتمد على طول الحدود مع الجزائر وتبتعد عليه أحيانا إلى 15 كلم، ولا يمكن للبوليزاريو تتسلل مرة أخرى داخل التراب المغربي.
السبب الثاني، هو أن هاذ المنطقة اللى هي تابعة للمغرب، على أرضها تكون الحرب، حيث البوليزاريو، ملي كانوا كيضربوا المغرب، كانوا كيرجعوا ويدخلوا للجزائر، والمغرب ملي كيتبعهم ما كيقدرش يدخل للجزائر لأنه ما باغيش الحرب معاها.
إذن دور الجدار هو حسم أرض المعركة، والبوليزاريو إلى بغات تتحارب تدخل لهاذ المنطقة، وبالفعل المغرب حقق انتصارات كثيرة وحسم المعركة لصالحه، والبوليزاريو ما بقاتش كتقدر دير الحرب مع المغرب، خاصة وأن هذه المنطقة عااااااااامرة ألغام، جزء كبير منها المغرب زرعها والبوليزاريو زرعات شوية أيضا.
ملي دخلات الأمم المتحدة على الخط، وتم توقيع اتفاق وقف اطلاق النار سنة 1991، تقسمات المنطقة لجوج أجزاء، منطقة غرب الجدار أي الصحراء حاليا اللي فيها العيون والداخلة... تحت إدارة المغرب، والمنطقة الثانية هي شرق الجدار سميت بالمنطقة العازلة، هي منطقة منزوعة السلاح، وتشرف المينورسو عليها، وخاصة عملية إزالة الألغام (حتى هي جزء من اختصاصات المينورسو).
البوليزاريو في السنوات الأخيرة بدات كتنظم أنشطة مدنية في المنطقة العازلة، مثلا مؤتمرات الجبهة كديرهم في تيفاريتي وسمات بير لحلو العاصمة ديال "الجمهورية العربية الصحراوية"، وكتسمي هاذ المناطق بـ"الاراضي المحررة"، عليها كان ناض مشكل كبير مع بان كي مون ملي مشا استقبل قيادات البوليزاريو في هاذ المنطقة على أساس أنها العاصمة.
الهدف ديال البوليزاريو من هاد الشي كامل هي أنها تحقق الشرط الثالث باش تقدر تمشي للأمم المتحدة وتطالب بالعضوية كدولة، والمعروف أن أي كيان بغا يتقدم للأمم المتحدة خاصو ثلاثة شروط قانونية، أولا يكون هناك شعب (البوليزاريو كتقول على راسها الشعب الصحراوي) والثاني أنها تكون عندها سلطة سياسية (عندها ما يسمى بالحكومة والبرلمان وووو) وأخيرا يكون عندها إقليم أي عندها أرض، وهنا فاش البوليزاريو كتسمي تلك الأرض بالأراضي المحررة.
البوليزاريو في عهد بان كي مون كانت قربات بزاااف من هاذ المخطط، اللي الآن أونطونيو غوتريس الأمين العام للأمم المتحدة أنهى الأمر، وسجل أن المنطقة العازلة غير تابعة للبوليزاريو.
علاش قلت قربات بزااف؟ لأنه بدات بعض الهيئات الأممية كتطرح المشكلة بشكل جدي على المغرب، فمثلا اللجنة المعنية بالحقوق الاقتصادية والاجتماعية والثقافية قالت في تقريرها سنة 2015 "تشعر بقلق بالغ لأن الجدار الرملي المحصن بالألغام المضادة للأفراد الذي أقامته الدولة الطرف بين الأراضي الخاضعة لسيطرة المغرب من إقليم الصحراء الغربية وبقية الإقليم يحول دون تمتع الشعب الصحراوي كلياً بحقوقه المكرسة في العهد".
إذن تحرير المغرب لمعبر الكركارات، ماشي فقط من أجل حركة المرور، بل أيضا لوأد أطروحة الأراضي المحررة نهائيا.
ومن هنا يمكن نفهموا علاش البوليزاريو صعّدات وشعلات، لأن خططها لمدة 20 عام انتهت في 20 دقيقة بالتدخل العسكري للجيش المغربي.
